लुम्बिनी, असोज २०, २०८३
नेपालका लागि जर्मनीका राजदूत महामहिम श्री उडो युगेन भोल्जले ६ अक्टोबर २०२६ मा लुम्बिनीस्थित पवित्र उद्यानको भ्रमण गरी बौद्ध धर्मका प्रवर्तक तथा शान्ति, करुणा र अहिंसाका विश्वव्यापी प्रतीक भगवान् गौतम बुद्धको पवित्र जन्मस्थलमा श्रद्धाञ्जली अर्पण गर्नुभयो।
लुम्बिनी आइपुग्नुभएका राजदूत भोल्जलाई लुम्बिनी विकास कोषका पदाधिकारी तथा स्थानीय समुदायका प्रतिनिधि, पर्यटन व्यवसायीलगायतले हार्दिक स्वागत गर्नुभयो।
भ्रमणका क्रममा लुम्बिनी विकास कोषका सूचना प्रमुख डा. हरि दाहाल राईले राजदूत तथा उहाँको भ्रमण दललाई लुम्बिनीको ऐतिहासिक, पुरातात्त्विक, सांस्कृतिक तथा आध्यात्मिक महत्त्वबारे जानकारी गराउनुभयो। उहाँले मायादेवी मन्दिर, अशोक स्तम्भ, मार्कर स्टोन (जन्मचिह्न शिला) तथा बुद्धको जन्मस्थलका रूपमा लुम्बिनीको ऐतिहासिक पहिचान पुष्टि गर्ने अन्य पुरातात्त्विक अवशेषहरूको महत्त्वबारे प्रकाश पार्नुभयो। साथै, विश्वभरका बौद्ध धर्मावलम्बी तथा आगन्तुकहरूका लागि लुम्बिनी पवित्र तीर्थस्थल, ध्यान तथा आध्यात्मिक चिन्तनको केन्द्रका रूपमा रहेको पवित्र उद्यानको महत्त्वसमेत उल्लेख गर्नुभयो।
राजदूत भोल्जले बुद्धको पवित्र जन्मस्थलमा श्रद्धाञ्जली अर्पण गर्नुका साथै युनेस्कोको विश्व सम्पदा सूचीमा सूचीकृत लुम्बिनीको पवित्र उद्यानको शान्त वातावरणको अवलोकन गर्नुभयो। यस भ्रमणले लुम्बिनीको समृद्ध ऐतिहासिक तथा सांस्कृतिक सम्पदालाई नजिकबाट बुझ्ने र यसले विश्वलाई दिँदै आएको शान्ति, करुणा, सद्भाव तथा आपसी समझदारीको सन्देशलाई आत्मसात् गर्ने अवसर प्रदान गर्यो।
लुम्बिनी विकास कोषले अन्तर्राष्ट्रिय विशिष्ट व्यक्तित्व तथा आगन्तुकहरूलाई लुम्बिनीमा हार्दिक स्वागत गर्दै बौद्ध सम्पदा, आध्यात्मिक पर्यटन तथा विश्व शान्ति प्रवर्द्धनको अन्तर्राष्ट्रिय केन्द्रका रूपमा लुम्बिनीको महत्त्वलाई पुनः उजागर गरेको छ।
Nepali
English
